სოკო – უსიამოვნო და გავრცელებული ინფექციური დაავადებაა, რომელიც შეგიძლიათ აიკიდოთ საზოგადოებრივ საშხაპეში, პლაჟზე ან სპა-სალონში.
სოკოვანი ინფექცია
სოკოს ინფექცია შეიძლება გაჩნდეს როგორც ხელის, ასევე ფეხის ფრჩხილებზე. მაგრამ უფრო ხშირად გვხვდება ფეხზე, რადგან ნესტიან და ბნელ გარემოში (ფეხსაცმელში) თავს შესანიშნავად გრძნობს.
ფეხის სოკოს ყველაზე ხშირი გამავრცელებელია დერმატოფიტი. დაავადება ნელ-ნელა იკვეთება. ჯერ ფრჩხილზე ჩნდება პატარა ყვითელი ან თეთრი ლაქა. დროის გასვლის შემდეგ ის ფერს იცვლის, თხელდება და იფცქვნება. ტკივილი გვიან ჩნდება, როცა ფრჩხილი ტყდება. აქამდე სოკო დისკომფორტს არ გიქმნით.
როგორ ვიმკურნალოდ სწორად
ჯერ დარწმუნდით, რომ სოკოს ინფექცია გაქვთ. თუ დიდხანს გეცვათ მოუხერხებელი ფეხსაცმელი ან მარათონი გაირბინეთ, გაყვითლებული და შრეებად ამძვრალი ფრჩხილი შეიძლება ტრავმის შედეგი იყოს. სხვა მიზეზებია: კონტაქტური დერმატიტი, ფსორიაზი, ფრჩხილის დისტროფია ან ბაქტერიული ინფექცია. მაგრამ თუ ფრჩხილმა მოულოდნელად დაიწყო გაყვითლება და აქერცვლა, დერმატოლოგს მიაკითხეთ. თავიდანვე უნდა გაგაფრთხილოთ, რომ მკურნალობა ხანგრძლივია, შეიძლება რამდენიმე თვეც კი გაგრძელდეს.
როგორ ვუმკურნალოთ ფეხის სოკოს
დერმატოლოგმა შეიძლება გამოგიწეროთ სოკოს საწინააღმდეგო კრემი, ლოსიონი ან ლაქი. ბრიტანული დერმატოლოგიური ასოციაციის მიხედვით, სამკურნალო პრეპარატი უნდა შეიცავდეს: ციკლოპიროქსს, ტიოკონაზოლს ამ ამოროლფინს.
ფრჩხილის დამუშავება მოგიწევთ ხანგრძლივად, სანამ სოკო არ გაქრება. მნიშვნელოვანი დეტალი: მალამო უნდა წაისვათ მთელ ფრჩხილზე და მის გარშემო არსებულ კანზე, რადგან ინფექცია შეიძლება დაბინავდეს კუტიკულაზე ან ფრჩხილის ქვეშ.
თუ სოკომ რამდენიმე ფრჩხილი დაგიზიანათ, ექიმი სოკოს საწინააღმდეგი აბებს შეგირჩევთ: ტერბინაფინის, იტრაკონაზოლის ან ფლუკონაზოლის ჯგუფის. გაფრთხილდით, აბებს შეიძლება უკუჩვენება ჰქონდეს და ექიმის მეთვალყურეობის გარეშე მათი დალევა არ შეიძლება.
დერმატოლოგმა შეიძლება ფრჩხილის მოცილება გირჩიოთ, ეს უსიამოვნო პროცედურაა, მაგრამ ის სწრაფად გაგათავისუფლებთ ინფექციის წყაროსგან და საშუალებას მოგცემთ, დაიმუშაოთ კანი ფრჩხილის ქვეშ.
როგორ არ გაგვიჩნდეს სოკო
როგორც წესი, სოკო თბილ და ნესტიან გარემოში ჩნდება – საერთო საშხაპე, აუზი, აბანოკომპლექსი.
დაიცავით შემდეგი წესები:
- შხაპის მიღების შემდეგ კარგად გაიმშრალეთ ფეხები, დაიმუშავეთ მიკროიარა, კარგად დაიბანეთ საპნით და წაისვით სამკურნალო კრემი.
- საერთო საშხაპეში, პლაჟზე, აუზზე, ფიტნეს-კლუბსა და სპა-ცენტრში გეცვათ ჩუსტი.
- თუ საერთო საშხაპეში ფეხშიშველას მაინც მოგიწიათ სიარული, ფეხები ანტისეპტიკით დაიმუშავეთ.
- აირჩიეთ მოსახერხებელი ფეხსაცმელი. სასურველია, ნატურალური ტყავის. რეგულარულად გაანიავეთ ფეხსაცმელი.
- სამსახურში თან იქონიეთ გამოსაცვლელი ფეხსაცმელი.
- პერიოდულად გათავისუფლდით ძველი ფეხსაცმლისგან.
- მანიკიურის გასაკეთებლად აირჩიეთ ის სალონი, სადაც სტერილიზაციას იცავენ, ყოველ ახალი კლიენტს უცვლიან ინსტრუმენტს. ოსტატმა თქვენი თანდასწრებით უნდა გახსნას ინსტრუმენტების პაკეტი, რომელსაც აწერია: “სტერილურია”.
- თუ ფრჩხილის სოკოსადმი მიდრეკილი ხართ, მანიკიურის ოსტატს სთხოვეთ, კუტიკულა არ მოგაჭრათ. ეს დაავადების რისკს ზრდის.
- თუ მანიკიურს შინ იკეთებთ, გამოყენების შემდეგ ინსტრუმენტი აუცილებლად გარეცხეთ საპნით, კარგად გაამშრალეთ და სპირტისშემცველი ანტისეპტიკით დაამუშავეთ.
რა არ უნდა გააკეთოთ:
- არ ჩაიცვათ ცხელი და დახურული ფეხსაცმელი, რომელშიც ფეხი გიოფლიანდებათ.
- არ ათხოვოთ არავის პირსახოცი და ჰიგიენის სხვა ნივთები.
- არ ჩაიცვათ სხვისი ფეხსაცმელი ან წინდები.
- არ გამოიყენოთ სხვისი მანიკიურის ინსტრუმენტები, მაკრატელი.
ფეხის სოკო – გავრცელებული და უსიამოვნო პრობლემაა. ის არ დაგემართებათ, თუ ჩვენს რჩევებს გაითვალისწინებთ. თუ უკვე გაქვთ სოკო, აუცილებლად მიმართეთ დერმატოლოგს. გაუფრთხილდით საკუთარ თავს!
