ქრონიკული ბრონქიტი, მისი სიმპტომები და მკურნალობის მეთოდები, უნდა შეგვეძლოს მისი ამოცნობა. .!
შემოდგომასა და ზამთარში საკმაოდ მაღალია სასუნთქი გზების ვირუსული ინფექციების დაავადების რისკი. გრიპზე რომ არაფერი ვთქვათ, გაციებაც კი ხშირად ხველას ხანგრძლივად გვიტოვებს.
რა არის ქრონიკული ბრონქიტი?
ქრონიკული ბრონქიტის მთავარი მიზეზი თამბაქოს მოწევაა. შესუნთქული თამბაქოს კვამლი აღიზიანებს სასუნთქ გზებს და მათში ხდება ლორწოს გამოყოფა. ადამიანებს, რომლებიც სხვა გამღიზიანებლების, როგორიცაა მტვერი, ქიმიური აირები, ზემოქმედებას ხანგრძლივად განიცდიან, ასევე ქრონიკული ბრონქიტის განვითარების მაღალი რისკი აქვთ.
ქრონიკული ბრონქიტი ხანგრძლივი მდგომარეობაა. ამ დაავადების დროს ბრონქიოლების შიგნითა შრეში მუდმივიად მიმდინარეობს გაღიზიანება და ანთება. ეს იწვევს ლორწოს გამოყოფას. ლორწო ამცირებს სასუნთქი გზების სანათურს, რაც იწვევს მათში ჰაერის მოძრაობის გაძნელებას.
ხველა, რომელიც რამდენიმე თვე გრძელდება და თითქმის ყოველთვის ახლავს ნახველი. პაციენტს ასევე შეიძლება ჰქონდეს სუნთქვის გაძნელება და გულ-მკერდის შებოჭვის შეგრძნება.
- ასეთ შემთხვევაში მიზანშეწონილია თუ არა ანტიბიოტიკების მიღება?
- ანტიბიოტიკები ხველას არ შველის. მათ მაშინ უნიშნავენ, როდესაც:
ზოგადი მდგომარეობა უარესდება, მაგალითად, ცხელება გრძელდება ორ კვირაზე მეტხანს; ანახველი ჩირქოვანია;
- მაშინ, როდესაც ეჭვი აქვთ მიკოპლაზმურ, ქლამიდიურ ინფექციებზე ან ყივანახველაზე;
- და მაშინ როდესაც ბრონქიტის სიმპტომებთან ერთად აღინიშნება სინუსიტი ან ოტიტი;
დაავადება მიმდინარეობს იმ პათოლოგიების ფონზე, რომლებიც ზრდის პნევმონიის განვითარების რისკს.
- მაშ როგორია მკურნალობის წესი?
- მშვიდი, კომფორტული გარემო, დიდი რაოდენობით სითხის და ანტიპირეტიული (სიცხის დამწევი) საშუალებების, როდესაც ტემპერატურა მიაღწევს 38,5 გრადუსს, ნახველის გამათხიერებლების (მუკოლიზური) მიღება.
ხველის დათრგუნვა განკურნებას არ აჩქარებს, ხანგრძლივობას არ ამცირებს, პირიქით - ნახველის ამოღების შეფერხებამ, შესაძლოა, ხელი შეუწყოს შეგუბებას და მეორადი გართულების განვითარებას. სწრაფი განკურნებისთვის აუცილებელია პათოგენეზის ძირითად რგოლზე მოქმედება, ანუ ანთებითი პროცესის ლიკვიდაცია.
ექიმთან შეთანხმებით უნდა დაინიშნოს პრეპარატები, რომლებიც ამ ანთებას ჩააქრობს. გარდა ამისა, კარგი იქნება, თუ პაციენტს მივაშველებთ ვიტამინებს - ეს ხელს შეუწყობს იმუნიტეტის გაძლიერებას. უნდა გვახსოვდეს, რომ ძლიერი ორგანიზმი ადვილად უმკლავდება რესპირაციულ ინფექციებს.
ბრონქიტის სამკურნალო ხალხური საშუალებები:
სველი ხველის დროს ეფექტურია ასეთი სასმელი: 3/4 ჭიქა ცხელ რძეს დაუმატეთ 1/4 ჭიქა ბორჯომი და პატარ-პატარა ყლუპებით დალიეთ.
ამ დროს ასევე კარგია ამოსახველებელი და ანთების საწინააღმდეგო თვისებების მქონე სამკურნალო მცენარეებიც: ვირისტერფა, მრავალძარღვა, გვირილა, წიწინაურის (ქაცბალახა) ფესვები, ტუხტის ფესვები, კამა.
ასევე ჩვენი რჩევა იქნება, რომ ბრონქიტისა და ფილტვების ანთების დროს რაციონი გაამდიდრეთ რძის ნაწარმით - მათში ბევრია კალციუმი, რომელიც ძალიან უხდება სასუნთქი გზების ანთებას და ადვილად ასათვისებელი სპეციფიკური ცხიმი.
